سه‌رۆكی ئه‌نجومه‌نی نوێنه‌ران ئوسامه‌ نوجه‌یفی هه‌وڵی تیرۆركردنی په‌رله‌مانتار به‌ها ئه‌عره‌جی سه‌رۆكی لیژنه‌ی نه‌زاهه‌ی له‌ په‌رله‌مان مه‌حكوم كردو داكۆكی له‌سه‌ر ئه‌وه‌شكرد كه‌ ئه‌و كاره‌ هه‌وڵێكی تیرۆریستانه‌یه‌ به‌ڵام ڕێگر نابێت له‌به‌رده‌م ئه‌نجومه‌نی نوێنه‌ران و ئه‌ندامه‌كانی و ساردیان ناكاته‌وه‌ له‌ كاری به‌رده‌وامیان بۆ ئاشكراكردنی دۆسیه‌كانی گه‌نده‌ڵی و كاراكردنی ڕۆڵی چاودێریانه‌ی ئه‌نجومه‌ن و به‌دیهێنانی ئامانج و هیواكانی گه‌لی عێراق.

سه‌رۆكی ئه‌نجومه‌نی نوێنه‌ران ئوسامه‌ نوجه‌یفی داوای له‌ حكومه‌ت كرد هه‌وڵه‌كانی چڕبكاته‌وه‌و تواناكانی به‌كاربهێنێت بۆ فریاكه‌وتنی ئه‌و كه‌سانه‌ی به‌هۆی لافاوه‌كانی پارێزگای نه‌ینه‌واو ناوچه‌كانی دیكه‌ی وڵات زیانیان به‌ركه‌وتووه‌و به‌پێویستی زانی به‌ ناوچه‌ی كاره‌ساتبار دابنرێن و په‌له‌ش بكرێت له‌ چاره‌سه‌ركردنی كێشه‌كانیان و قه‌ره‌بووكردنه‌وه‌ی زیانلێكه‌وتووان و یه‌كخستنی هه‌وڵه‌كانیش له‌گه‌ڵ ڕێكخراوه‌ نێوده‌وڵه‌تیه‌ فریاگوزاریه‌كان.

سه‌رۆكی ئه‌نجومه‌نی نوێنه‌ران ئوسامه‌ نوجه‌یفی نامه‌یه‌كی پیرۆزبایی ئاڕاسته‌ی گه‌لی یه‌زیدی كرد به‌بۆنه‌ی ئاهه‌نگه‌كانی هاتنی جه‌ژنی سه‌ری ساڵی یه‌زیدی. سه‌رۆكی ئه‌نجومه‌نی نوێنه‌ران هیوای خواست كه‌ ڕۆڵه‌كانی تایه‌فه‌ی یه‌زیدی له‌ گه‌لی عێراق له‌ خۆشی و گه‌شه‌كردندا بن بتوانن په‌رستشه‌ ئاینیه‌كانیان ب ئازادی له‌ عێراق ئه‌نجام بده‌ن به‌و پێیه‌ی ده‌ستور بۆ دابین كردوون و ئازادی و مافه‌ ئایینی و مه‌ده‌نیه‌كانیشیان پارێزراو بێت.