سه‌رۆكی ئه‌نجومه‌نی نوێنه‌ران ئوسامه‌ نوجه‌یفی له‌ چوارچێوه‌ی به‌رنامه‌ی سه‌ردانه‌كه‌یدا بۆ كۆماری چیك له‌گه‌ڵ پیته‌ر كۆلهانیك عومده‌ی شاری كارلۆفی فاری كۆبۆوه‌و له‌ دیدارێكدا سه‌رۆكی ئه‌نجومه‌نی نوێنه‌ران جه‌ختیكرده‌وه‌ له‌سه‌ر گرنگی پته‌وكردنی په‌یوه‌ندیه‌كانی نێوان عێراق و چیك و ئاماژه‌ی به‌وه‌شكرد كه‌ بنیاتنانی شارستانیه‌ته‌كان به‌هۆی په‌یوه‌ندی و درێژه‌دان به‌ بنیاتنان ده‌بێت ئه‌مه‌ جگه‌ له‌ گواستنه‌وه‌ی نه‌ریته‌كانی ڕه‌سه‌نایه‌تی و به‌رهه‌مه‌ شارستانیه‌كان بۆ نه‌وه‌كانی داهاتوو.

سه‌رۆكی ئه‌نجومه‌نی نوێنه‌ران ئوسامه‌ نوجه‌یفی پێشوازیكرد له‌ له‌ ژماره‌یه‌ك له‌ سه‌رۆك هۆزه‌كانی پارێزگای نه‌ینه‌واو فه‌للوجه‌و له‌ دیدارێكدا سه‌رۆكی ئه‌نجومه‌ن جه‌ختیكرده‌وه‌ كه‌ لیژنه‌كانی ئه‌نجومه‌نی نوێنه‌ران به‌رده‌وام كارده‌كه‌ن بۆ به‌دواداچوونی كاروباری هاوڵاتیان و چاره‌سه‌ركردنی كێشه‌كانیان.

سه‌رۆكی ئه‌نجومه‌نی نوێنه‌ران به‌بۆنه‌ی جه‌ژنی ئه‌كیدۆوه‌ پیرۆزبایی له‌ كه‌لدان و ئاشوری و سریانه‌كان كرد، ئه‌مه‌ی خواره‌وه‌ش ده‌قی پیرزۆباییه‌كه‌یه‌: به‌خۆشحاڵیه‌وه‌ جوانترین پیرۆزباییتان ئاڕاسته‌ ده‌كه‌م به‌بۆنه‌ی سه‌ری ساڵی بابلی ئاشوری ئه‌كیتۆ، ئێوه‌ برایان و خوشكان به‌شێوه‌یه‌كی به‌رچاوو ڕۆڵتان بینیوه‌ له‌ بنیاتنانی ئه‌م نیشتمانه‌و پته‌وكردنی یه‌كێتی خاكه‌كه‌ی و یه‌كڕیزی گه‌له‌كه‌ی له‌ هه‌زاران ساڵ له‌مه‌وپێشه‌وه‌، هه‌روه‌ك ئه‌مڕۆش ڕۆڵتان هه‌یه‌ له‌ بنیاتنانی عێراقی دیموكرات پاش ڕزگاربوونی له‌ دیكتاتۆریه‌ت و سته‌م و چه‌وساندنه‌وه‌

سه‌رۆكی ئه‌نجومه‌نی نوێنه‌ران ئوسامه‌ نوجه‌یفی به‌ هاوڕێیه‌تی دكتۆر رافیع ئه‌لعیساوی وه‌زیری دارایی و ژماره‌یه‌ك له‌ په‌رله‌مانتاران به‌شداریكرد له‌سه‌رجه‌م پرسه‌كانی شه‌هیدانی پارێزگای سه‌ڵاحه‌دین و دڵنه‌وایی كه‌سوكاری شه‌هیده‌كانی كرد، هه‌روه‌ك سه‌ردانی پارێزگای سه‌ڵاحه‌دینیشی كرد.

سه‌رۆكی ئه‌نجومه‌نی نوێنه‌ران له‌ په‌ڕاوێزی كۆنگره‌ی هه‌رێم و ئه‌و پارێزگایانه‌ی له‌ هه‌رێمدا نین له‌گه‌ڵ پارێزگارو سه‌رۆكی ئه‌نجومه‌نی پارێزگاكان كۆبۆوه‌و جه‌ختیكرده‌وه‌ له‌سه‌ر ئه‌وه‌ی كه‌ كاتی ئه‌وه‌ هاتووه‌ ده‌سه‌ڵاته‌كانی هه‌ریه‌ك له‌ حكومه‌تی فیدڕاڵی و پارێزگاكان جیابكرێته‌وه‌ به‌شێوه‌یه‌ك لامه‌ركه‌زیه‌ت پیاده‌بكرێت، هه‌روه‌ك به‌پێویستی زانی كه‌ هه‌موولایه‌ك به‌یه‌كه‌وه‌ كاربكه‌ن بۆ سه‌رخستنی ئامانجی هاوبه‌ش و گشتی بۆ چه‌سپاندنی مافه‌كانی هاوڵاتیان و بنیاتنانی وڵات و له‌ناوبردنی گه‌نده‌ڵی و چه‌سپاندنی دیموكراتیه‌ت و ئازادیه‌كان به‌و شێوه‌یه‌ی له‌ ده‌ستوردا ئاماژه‌یان پێكراوه‌.

سه‌رۆكی ئه‌نجومه‌نی نوێنه‌ران ئوسامه‌ نوجه‌یفی له‌ په‌یوه‌ندیه‌كی ته‌له‌فۆنیدا له‌گه‌ڵ دكتۆر به‌شار ئه‌سه‌د سه‌رۆكی سوریا دوا په‌ره‌سه‌ندنه‌كانی بارودۆخی ناوچه‌كه‌ به‌ گشتی و وڵاتی سوریایان به‌ تایبه‌تی تاووتوێ كرد. له‌و په‌یوه‌ندیه‌دا سه‌رۆكی ئه‌نجومه‌نی نوێنه‌ران بایه‌خی عێراقی بو ڕووداوه‌كانی ئه‌مدواییه‌ی سوریاو به‌دواداچوونی پێشهاته‌كانی خسته‌ڕوو له‌به‌رئه‌وه‌ی كاریگه‌ری له‌ ناوچه‌كه‌ به‌گشتی ده‌بێت و ڕه‌نگدانه‌وه‌ی له‌سه‌ر عێراقیش ده‌بێت.