به‌ڕێز ئوسامه‌ نوجه‌یفی سه‌رۆكی ئه‌نجومه‌نی نوێنه‌ران ڕۆژی سێشه‌ممه‌ به‌رواری 8/2/2011 له‌ نوسینگه‌ی خۆی پێشوازیكرد له‌ به‌ڕێز ولیه‌م سبێنسه‌ر به‌ڕێوه‌به‌ری جێبه‌جێكاری ده‌زگای یاسای نێوده‌وڵه‌تی و مافه‌كانی مرۆڤ و شاندێكی هاوڕێی، له‌دیداره‌كه‌دا سه‌رۆكی ئه‌نجومه‌نی نوێنه‌ران جه‌ختیكردوه‌ له‌سه‌ر ئه‌وه‌ی ئه‌نجومه‌نی نوێنه‌ران هه‌وڵ ده‌دات بۆ زیاتر چه‌سپاندنی مافه‌كانی مرۆڤ و دیموكراتیه‌ت له‌ عێراق به‌و پێیه‌ی دوو گره‌نتی سه‌ره‌كین بۆ ڕزگاربوون له‌ دیكتاتۆریه‌ت، ئاماژه‌ی به‌وه‌شكرد كه‌ عێراق به‌ قۆناغێكی گواستنه‌وه‌دا ده‌گوزه‌رێت و هه‌نگاو ده‌نێت له‌ حوكمڕانی ناوه‌ندی تونده‌وه‌ به‌ره‌و سیسته‌مێكی دیموكراتی له‌سه‌ر بنه‌مای ئازادی و ماف، ئه‌مه‌ش پێویستی به‌شاره‌زایی زۆری نێوده‌وڵه‌تی و ئه‌و نه‌ریتانه‌ هه‌یه‌ كه‌ دیموكراتیه‌ت ده‌چه‌سپێنن.

سه‌رۆكی ئه‌نجومه‌نی نوێنه‌ران ڕۆژی سێشه‌ممه‌ به‌رواری 8/2/2011 له‌ نوسینگه‌ی خۆی پێشوازیكرد  شێخ ئیسماعیل جه‌زاع موعزیل ئه‌لكه‌عود و به‌ڕێز حه‌سه‌ن وه‌هه‌ب عه‌لی ڕاوێژكاری ئاسایشی وه‌زاره‌تی كاره‌با، له‌و دیداره‌دا سه‌رۆكی ئه‌نجومه‌نی نوێنه‌ران په‌یوه‌ندی پته‌وی نێوان پێكهاته‌كانی عێراقی به‌رز هه‌ڵسه‌نگاندو ئه‌وه‌ی خسته‌ڕوو كه‌ هاوڵاتیانی عێراقی له‌كتره‌وه‌ نزیكن و له‌سه‌ر ڕێبازی دروستی چاكسازیشدان.

سه‌رۆكی ئه‌نجومه‌نی نوێنه‌ران له‌ چوارچێوه‌ی دیدارێكیدا له‌گه‌ڵ به‌ڕێز شه‌ریف شاهین باڵوێزی میسر له‌ عێراق سووربوونی عێراقی نیشاندا له‌سه‌ر یه‌كپارچه‌یی خاك و خه‌ڵكی میسرو دیاریكردنی چاره‌نووسی میسر له‌لایه‌ن خه‌ڵكی وڵاته‌كه‌یانه‌وه‌ به‌بێ ده‌ستێوردانی ده‌ره‌كی و ووتیشی:"گه‌لی میسر گه‌لێكی هۆشیاره‌و خاوه‌نی مێژوویه‌كی دێرینه‌و ده‌توانێت ئه‌م ته‌نگژه‌یه‌ی ئێستا تێپه‌ڕێنێت".