سه‌رۆكی ئه‌نجومه‌نی نوێنه‌ران ئوسامه‌ نوجه‌یفی ڕۆژی پێنجشه‌ممه‌ به‌رواری 27/1/2011 سه‌ردانی پارێزگای تكریتی كردو له‌و سه‌ردانه‌شدا سه‌رۆكی ئه‌نجومه‌نی نوێنه‌ران وێڕای ناڕه‌زایی ده‌ربڕین له‌ دژی ئه‌و كاره‌ تاوانكاریه‌ی كۆمه‌ڵێك خۆبه‌خشی به‌ئامانجگرت و ده‌یان كه‌سی كرده‌ قوربانی، ئاماژه‌ی به‌وه‌شكرد كه‌ تیرۆر كاتێك ناوچه‌ جیاوازه‌كانی وڵات به‌ ئامانج ده‌گرێت ده‌یه‌وێت ژیانی تێدا بوه‌ستێنێت و په‌راوێزخراویان بكات، به‌ڵام داكۆكی له‌سه‌ر ئه‌وه‌كرد كه‌ هه‌رگیز تیرۆریستان ناتوانن وڵات بوه‌ستێنن و به‌شداری له‌ به‌رپرسیارێتی ڕابگرن چونكه‌ پێویسته‌ هه‌موولایه‌ك به‌یه‌كه‌وه‌ كاربكه‌ن بۆ به‌ڕێوه‌بردنی وڵات.

سه‌رۆكی ئه‌نجومه‌نی نوێنه‌ران ئوسامه‌ نوجه‌یفی ڕۆژی هه‌ینی به‌رواری 28/1/2011 له‌ چوارچێوه‌ی سه‌ردانێكیدا بۆ پارێزگای موسڵ سه‌ردانی كۆلێژی په‌روه‌رده‌ی كرد له‌ قه‌زای حه‌مدانیه‌ كه‌ به‌بنه‌مای سه‌ره‌كی زانكۆی حه‌مدانیه‌ داده‌نرێت، هه‌روه‌ك بڕی 100 ملیۆن دیناریشی به‌خشیه‌ ئه‌و كۆلێژه‌.هه‌روه‌ها سه‌رۆكی ئه‌نجومه‌نی نوێنه‌ران له‌و سه‌ردانه‌دا له‌گه‌ڵ به‌رپرسانی قه‌زای حه‌مدانیه‌ كۆبۆوه‌و گوێبیستی ئه‌و كێشه‌و گرفتانه‌ بوو كه‌ ئه‌و قه‌زایه‌ به‌ده‌ستیه‌وه‌ ده‌ناڵێنێت.

سه‌رۆكی ئه‌نجومه‌نی نوێنه‌ران ئوسامه‌ نوجه‌یفی نیوه‌ڕۆی ڕۆژی چوارشه‌ممه‌ به‌رواری 26/1/2011 پێشوازیكرد له‌ ڤالێری شۆڤانێف باڵوێزی ڕوسیا له‌ عێراق و له‌سه‌ره‌تای دیداره‌كه‌دا باڵوێزی ڕوسیا به‌ناوی سه‌ركرده‌كانی ڕوسیاوه‌ پیرۆزبایی ئاڕاسته‌ی سه‌رۆكی ئه‌نجومه‌ن كرد به‌بۆنه‌ی وه‌رگرتنی پۆسته‌كه‌ی.له‌دیداره‌كه‌شدا هه‌ردوولا گفتوگۆیانكرد له‌باره‌ی په‌یوه‌ندیه‌كانی نێوان هه‌ردوو وڵات و چۆنیه‌تی به‌ره‌وپێشبردنی و هاوڕابوون له‌سه‌ر ئاڵۆگۆڕی سه‌ردانه‌كان له‌ نێوان په‌رله‌مانی هه‌ردوو وڵات، له‌مڕوه‌شه‌وه‌ باڵوێزی ڕوسیا ئاماده‌یی وڵاته‌كه‌ی نیشاندا بۆ بزواندنی په‌یوه‌ندیه‌ په‌رله‌مانیه‌كان و په‌ره‌پێدانی له‌ نێوان هه‌ردوو وڵاتدا.

سه‌رۆكی ئه‌نجومه‌نی نوێنه‌ران ئوسامه‌ نوجه‌یفی له‌گه‌ڵ بورهان شاوی سه‌رۆكی ده‌سته‌ی ڕاگه‌یاندن و گه‌یاندن كۆبۆوه‌ به‌مه‌به‌ستی تاووتوێكردنی بڕیاری دادگای باڵای فیدڕاڵی سه‌باره‌ت به‌ ده‌سته‌ سه‌ربه‌خۆكان به‌وه‌ی له‌ژێر سه‌رپه‌رشتی حكومه‌تدا بێت.له‌و دیداره‌دا سه‌رۆكی ئه‌نجومه‌نی نوێنه‌ران داكۆكیكرد له‌سه‌ر پێویستی مامه‌ڵه‌كردن له‌گه‌ڵ بارودۆخی دیموكراتی نوێ له‌ عێراق كه‌ له‌ قۆناغی بنیاتناندایه‌و جه‌ختی له‌سه‌ر ئه‌وه‌شكرده‌وه‌ كه‌ نابێت باز به‌سه‌ر ماده‌و بڕگه‌كانی ده‌ستوردا بدرێت و پێویسته‌ ڕێز له‌ ڕۆڵی په‌رله‌مان بگیرێت كه‌ به‌رزترین ده‌سه‌ڵاته‌ له‌ وڵاتدا له‌به‌رئه‌وه‌ی ده‌سه‌ڵاتی له‌ گه‌له‌وه‌ وه‌رگرتووه‌.

سه‌رۆكی ئه‌نجومه‌نی نوێنه‌ران ئوسامه‌ نوجه‌یفی له‌گه‌ڵ فه‌ره‌ج حه‌یده‌ری سه‌رۆكی كۆمسیۆن باڵای سه‌ربه‌خۆی هه‌ڵبژاردنه‌كان و ئه‌ندامانی ئه‌نجومه‌نی كۆمسیۆنی باڵای سه‌ربه‌خۆی هه‌ڵبژاردنه‌كان كۆبۆوه‌ به‌مه‌به‌ستی تاووتوێكردنی بڕیاری دادگای باڵای فیدڕاڵی سه‌باره‌ت به‌ ده‌سته‌ سه‌ربه‌خۆكان به‌وه‌ی له‌ژێر سه‌رپه‌رشتی حكومه‌تدا بێت.