سه‌رۆكی ئه‌نجومه‌نی نوێنه‌ران ئوسامه‌ نوجه‌یفی ناڕه‌زایی ده‌ربڕی به‌رامبه‌ر ئه‌و دوو كاره‌ تیرۆریستیه‌ی كه‌ هاوڵاتیانی به‌ ئامانجگرت له‌ هه‌ردوو پارێزگای دیاله‌و كه‌ربه‌لای پیرۆزو له‌ ئه‌نجامدا چه‌ندین هاوڵاتی بێتاوان بوونه‌ قوربانی.هه‌روه‌ها سه‌رۆكی ئه‌نجومه‌نی نوێنه‌ران ئه‌و ڕووداوه‌ی به‌ دژی گه‌لی عێراق وه‌سفكردو داكۆكی له‌سه‌ر ئه‌وه‌كرد كه‌ ئه‌و كارانه‌ پێچه‌وانه‌ی هه‌موو پێوه‌ره‌ مرۆیی و ئه‌خلاقیه‌كانه‌و هه‌وڵێكه‌ بۆ گه‌ڕانه‌وه‌ی عێراق به‌ره‌و توندوتیژی مه‌زهه‌بی و دروستكردنی له‌مپه‌ره‌ له‌به‌رده‌م به‌ره‌وپێشچوونی ئاشتی و ئاسایش و به‌رقه‌راری له‌ عێراقدا.

سه‌رۆكی ئه‌نجومه‌نی نوێنه‌ران ئوسامه‌ نوجه‌یفی به‌توندی ناڕه‌زایی ده‌ربڕی له‌دژی ئه‌و ته‌قینه‌وه‌ تیرۆریستیه‌ی ده‌سته‌یه‌ك له‌و كه‌سانه‌ی به‌ئامانجگرت كه‌ ده‌یانویست خۆیان بۆ نێو ڕیزه‌كانی پۆلیس تۆمار بكه‌ن كه‌ بووه‌ هۆی برینداربوون و شه‌هیدبوونی ده‌یان كه‌س.سه‌رۆكی ئه‌نجومه‌نی نوێنه‌ران ئاماژه‌ی به‌وه‌كرد كه‌ ئه‌و كاره‌ به‌هه‌موو پێوه‌رێك كارێكی ترۆریستیه‌و سوكایه‌تیكردنه‌ به‌ گیانی هاوڵاتیان و هه‌وڵێكه‌ بۆ ڕێگرتن له‌به‌رده‌م ئه‌و پێشكه‌وتنه‌ی كه‌ به‌مدواییه‌ عێراق به‌خۆیه‌وه‌ بینیویه‌تی، هه‌روه‌ك سه‌رۆكی ئه‌نجومه‌ن پرسه‌ی ئاڕاسته‌ی كه‌سوكاری شه‌هیدان كردو هیوای چاكبوونه‌وه‌ی بۆ برینداره‌كانیش خواست.

سه‌رۆكی ئه‌نجومه‌نی نوێنه‌ران ئوسامه‌ نوجه‌یفی له‌ ڕۆژی دووشه‌ممه‌ به‌رواری 17/1/2011 له‌ نوسینگه‌ی خۆی پێشوازیكرد له‌ ژماره‌یه‌ك له‌ سه‌رۆكی ڕێكخراوه‌كانی كۆمه‌ڵگه‌ی مه‌ده‌نی و له‌و دیداره‌دا گوێبیستی ئه‌و كێشه‌و گرفتانه‌بوو كه‌ سه‌رۆكی ئه‌و ڕێكخراوانه‌ خستیانه‌ڕوو سه‌باره‌ت به‌ بێكاری و گرفتی بێباوكان و بێوه‌ژنان.

سه‌رۆكی ئه‌نجومه‌نی نوێنه‌ران ڕۆژی یه‌كشه‌ممه‌ به‌رواری 16/1/2011 له‌ باره‌گای ئه‌نجومه‌نی نوێنه‌ران پێشوازیكرد له‌ ئه‌حمه‌د داود ئۆغلۆ وه‌زیری ده‌ره‌وه‌ی توركیاو شاندی هاوڕێی، له‌و دیداره‌دا سه‌رۆكی ئه‌نجومه‌نی نوێنه‌ران داكۆكیكرد له‌سه‌ر ئه‌وه‌ی سه‌رجه‌م پێكهاته‌كانی خه‌ڵكی عێراق ڕێز له‌ وڵاتی توركیا ده‌گرن به‌رامبه‌ر ئه‌و ڕۆڵه‌ ئیجابیه‌ی كه‌ له‌ عێراق بینیویه‌تی.هه‌روه‌ك سه‌رۆكی ئه‌نجومه‌نی نوێنه‌ران ووتیشی:"ئه‌نجومه‌نی نوێنه‌ران پێشوازی ده‌كات له‌ هاریكاری ستراتیژی له‌ نێوان عێراق و توركیا له‌سه‌رجه‌م بواره‌كانداو هیواشمان وایه‌ كه‌ هاریكاریه‌كی له‌مشێوه‌یه‌ ڕۆڵی هه‌بێت له‌ به‌ره‌وپێشبردنی هه‌ردوو وڵاتی دۆست له‌سه‌رجه‌م بواره‌كاندا".