شێخ خالید عه‌تیه‌ جێگری‌ یه‌كه‌می‌ سه‌رۆكی‌ ئه‌نجومه‌نی‌ نوێنه‌ران سه‌رله‌به‌یانی‌ ئه‌مڕۆ له‌ نوسینگه‌ی‌ خۆی‌ له‌ به‌غدا پێشوازی‌ كرد له‌ به‌ڕێز فه‌ره‌ج حه‌یده‌ری‌ سه‌رۆكی‌ كۆمسیۆنی‌ باڵای‌ سه‌ربه‌خۆی‌ هه‌ڵبژاردنه‌كان و به‌ڕێز قاسم ئه‌لعه‌بودی‌ ئه‌ندامی ئه‌نجومه‌نی‌ كۆمسیۆن. له‌دیداره‌كه‌دا هه‌ردوولا گرنگترین قۆناغه‌كانی‌ به‌ره‌وپێشچوونی‌ كۆمسیۆنیان تاووتوێكرد له‌گه‌ڵ ئاماده‌سازیه‌كان بۆ ئه‌نجامدانی‌ هه‌ڵبژاردنی‌ ئه‌نجومه‌نی‌ پارێزگاكان و هه‌ڵبژاردنی‌ گشتی‌، له‌مباره‌یه‌شه‌وه‌ شێخ خالید عه‌تیه‌ ووتی‌" پێویسته‌ كاری‌ كۆمسیۆن سه‌ربه‌خۆ بێت و دوور بێت له‌ هه‌ر كاریگه‌ریه‌كی‌ سیاسی‌ چونكه‌ ئه‌م ده‌زگایه‌ ئاوێنه‌ی‌ سیسته‌می‌ دیموكراس نوێیه‌ له‌ عێراق و به‌رپرسیاریه‌تی‌ گه‌وره‌ی‌ له‌سه‌رشانه‌ كه‌ خۆی‌ ده‌بینێته‌وه‌ له‌ ڕێزگرتنی‌ ده‌نگده‌رانی‌ عێراقی‌ و ویستیان له‌ هه‌ڵبژاردنی‌ نوێنه‌ره‌كانیان بۆ ده‌سه‌ڵات." هه‌روه‌ها به‌ڕێزیان جه‌ختیان كرده‌وه‌ له‌سه‌ر سوودوه‌رگرتن له‌ كارمه‌ندانی‌ پێشوو له‌گه‌ڵ ئه‌وه‌ی‌ كه‌ پێویسته‌ دابمه‌زرێنرێن له‌سه‌ر میلاكی‌ كۆمسیۆن له‌به‌رئه‌وه‌ی‌ خاوه‌نی‌ شاره‌زایین له‌ بواری‌ هه‌ڵبژاردن و كاری‌ كۆمسیۆن.