ئه‌نجومه‌نی نوێنه‌ران له‌ دانیشتنی ئاسایی چل و هه‌شته‌می خۆیدا به‌سه‌رۆكایه‌تی ئوسامه‌ نوجه‌یفی سه‌رۆكی ئه‌نجومه‌نی نوێنه‌ران و به‌ ئاماده‌بوونی 173 په‌رله‌مانتار له‌ ڕۆژی پێنجشه‌ممه‌ به‌رواری 31/3/2011 تاووتوێی پڕۆژه‌ی یاسای موچه‌و ده‌رماڵه‌ی سه‌رۆك كۆمارو جێگره‌كانی و سه‌رۆكی ئه‌نجومه‌نی وه‌زیران و جێگره‌كانی و وه‌زیرو بریكاری وه‌زیرو ئه‌وانه‌ی له‌و پله‌یه‌دان یان هه‌مان مووچه‌ وه‌رده‌گرن له‌گه‌ڵ ڕاوێژكاران و خاوه‌ن پله‌ تایبه‌ته‌كان و به‌ڕێوه‌به‌ره‌ گشتیه‌كان و ئه‌وانه‌ی له‌و پله‌یه‌دان و هه‌مان مووچه‌ وه‌رده‌گرن و پاداشتی مانگانه‌ی سه‌رۆكی ئه‌نجومه‌نی نوێنه‌ران و دوو جێگره‌كه‌ی و ئه‌ندامانی ئه‌نجومه‌نی نوێنه‌رانی تاووتوێكردو بڕیاریش وایه‌ له‌ دانیشتنی داهاتوودا گفتوگۆكان درێژه‌یان هه‌بێت پاش ئه‌وه‌ی هه‌ردوو لیژنه‌ی یاسایی و دارایی ڕاپۆرتی هاوبه‌شی خۆیان پێشكه‌ش ده‌كه‌ن.

له‌ ژێر دروشمی (له‌ پێناو سیسته‌مێكی لامه‌ركه‌زی پته‌و له‌ ژێر سایه‌ی عێراقێكی دیموكرات و فیدڕال) به‌سه‌رپه‌رشتی ئه‌نجومه‌نی نوێنه‌رانی عێراق كۆنگره‌ی ده‌سه‌ڵاتی هه‌رێم و ئه‌و پارێزگایانه‌ی له‌ هه‌رێمدا نین كه‌ ڕۆژانی 30-31ی ئازار ده‌خایه‌نێت ده‌ستی به‌كاره‌كان كرد.له‌سه‌ره‌تای كردنه‌وه‌ی كۆنگره‌كه‌دا سوره‌تی فاتیحه‌ بۆ گیانی شه‌هیدانی ڕووداوه‌ تیرۆریستیه‌كه‌ی پارێزگای سه‌ڵاحه‌دین خوێندرا.

ئه‌نجومه‌نی نوێنه‌ران له‌ دانیشتنی ژماره‌ چل و حه‌وته‌می ئاسایی خۆیدا به‌سه‌رۆكایه‌تی ئوسامه‌ نوجه‌یفی سه‌رۆكی ئه‌نجومه‌نی نوێنه‌ران له‌ ڕۆژی سێشه‌ممه‌‌ به‌رواری 29/3/2011 به‌ زۆرینه‌ی ده‌نگ سه‌ركوتكردنی ڕاپه‌ڕینی شه‌عبانی و ئازاری موباره‌ك له‌ ساڵی 1991‌ به‌ تاوانی دژ به‌مرۆڤایه‌تی دانا به‌ هه‌موو ماناكانیه‌وه‌.

ئه‌نجومه‌نی نوێنه‌ران له‌ دانیشتنی ژماره‌ چل و شه‌شه‌می ئاسایی خۆیدا به‌سه‌رۆكایه‌تی ئوسامه‌ نوجه‌یفی سه‌رۆكی ئه‌نجومه‌نی نوێنه‌ران له‌ ڕۆژی دووشه‌ممه‌‌ به‌رواری 28/3/2011 میوانداری به‌ڕێز ڕه‌جه‌ب ته‌یب ئۆردۆگان سه‌رۆك وه‌زیرانی توركیاو شاندی هاوڕێی كردو سه‌ره‌تاش سه‌رۆكی ئه‌نجومه‌نی نوێنه‌ران به‌خێرهاتنی شاندی میوانی كردو ئاماژه‌ی به‌وه‌كرد كه‌ ڕایه‌ڵه‌ی په‌یوه‌ندیه‌كانی عێراق و توركیا زۆرن.

دكتۆر قوسه‌ی سوهه‌یل جێگری یه‌كه‌می سه‌رۆكی ئه‌نجومه‌نی نوێنه‌ران هه‌ڵوێستی ده‌وڵه‌تی كوه‌یتی به‌رز نرخاند له‌به‌رئه‌وه‌ی هێزی سه‌ربازی ڕه‌وانه‌ی كوه‌یت نه‌كردو نه‌بووه‌ به‌شێك له‌ سه‌ركوتكردنی گه‌لی به‌حره‌ین كه‌ داوای مافه‌كانی ده‌كات.

به‌بۆنه‌ی ئاهه‌نگه‌كانی ڕۆڵه‌كانی گه‌له‌كه‌مان له‌ تایه‌فه‌ی سابیئه‌ی مه‌ندائی به‌هاتنی جه‌ژنی خه‌لیقه‌وه‌ جوانترین و گه‌رمترین پیرۆزبایی ئاڕاسته‌ی سه‌رجه‌م برایانی مه‌ندائی ده‌كه‌ین له‌ ناوه‌وه‌و ده‌ره‌وه‌ی عێراق، داوا له‌ خوای گه‌وره‌ ده‌كه‌ین كه‌ هه‌موو بۆنه‌و جه‌ژنه‌كانی گه‌لی عێراقی مه‌زن به‌سه‌رجه‌م تایه‌فه‌و نه‌ته‌وه‌كانیه‌وه‌ به‌ ته‌بایی و یه‌كگرتوویی بكه‌ینه‌وه‌ له‌ عێراقێكدا كه‌ هه‌موو ڕۆڵه‌كانی له‌خۆبگرێت و ئه‌وانیش به‌ خێروبێره‌كانی دڵخۆش ببن.

ئه‌نجومه‌نی نوێنه‌ران له‌ دانیشتنی ژماره‌ چل و چواره‌‌‌می ئاسایی خۆیدا به‌سه‌رۆكایه‌تی ئوسامه‌ نوجه‌یفی سه‌رۆكی ئه‌نجومه‌نی نوێنه‌ران له‌ ڕۆژی پێنجشه‌ممه‌‌ به‌رواری 17/3/2011 به‌ ئاماده‌بوونی 196 ده‌نگیدا له‌سه‌ر هه‌ڵپه‌ساردنی دانیشتنی خۆی وه‌ك پشتیوانیه‌ك بۆ خۆپیشانده‌رانی ده‌وڵه‌تی به‌حره‌ین، هه‌روه‌ك ده‌نگیشدرا له‌سه‌ر بڕیارێك به‌وه‌ی ئه‌وه‌ی به‌سه‌ر خه‌ڵكی هه‌ڵه‌بجه‌دا هات له‌ به‌رواری 16/3/1988 به‌ تاوانی له‌ناوبردنی به‌كۆمه‌ڵ داده‌نرێت.